Wararka laga helayo magaalada Jiddah ee Boqortooyada Sacuudiga ayaa sheegaya inuu Qarax ka dhcay Qabuuraha dadka aan muslimiinta ahayn ee magaaladaasi xilli ay ku sugnaayeen Qunsuliyiin ajaaniib ah oo ka mid yahay Qunsulka Faransiiska ee magaalada Jiddah.

Qaraxa oo la sheegay in loo adeegsaday Bam ayaa dhacay iyadoo maanta xus loo sameynayey dhammaanshaha dagaalweyinii labaad ee Dunida, waxaana qaraxa ku dhaawacmay 4 qof, iyadoo diblomaasiyiinta goobta ku sugnaa ay ka mid ahaayeen xubno ka socda dalalka Faransiiska, Giriiga iyo Ingiriiska.

Waxaa la xaqiijiyey in qof Giriig uu ka mid yahay dadka ku dhaawacmay Qaraxa, waxaana weli soo baxaya faahfaahinta qaraxan oo lama filaan ahaa.

Qof lagu tuhunsan yahay inuu Bam ku tuuray Qabuuraha weerarku ka dhacay ayey Boolisku qabteen, iyadoo baaritaan ku socdo, sida laga soo xigtay warbaahinta Sacuudiga.