24-kii saac ee lasoo dhaafay waxaa baraha bulshada Soomaalida hareeyay isbedel yaab leh oo ku saabsan isku milanka aragtida siyaasadeed ee taageerayaasha Madaxweynayaashii hore Shariif Sheekh Axmed iyo Maxamed C/llaahi Farmaajo.
Taageerayaasha Farmaajo ee Baraha bulshada ayaa bilaabay shalay inay u doodaan Sheekh Shariif, kadib markii Telefishanka Dowladda laga baahin waayey hadal-jeedintiisii uu sida weyn ugu dhaliilay wax ka bedelka Dastuurka KMG ah ee ay wado dowladda Madaxweyne Xasan Sheekh.
Dhammaan xubnaha taageersan Farmaajo ayaa si isku mida u weerarray SNTV, waxayna si aan hore loo arag u garab istaageen Sheekh Shariif, waxayna dagaalka uga horeeyeen Sheekh Shariif iyo xisbigiisa.
Mar dambe ayuu Sheekh Shariif qoraal kooban soo saaray, kuna sheegay inuusan ogeyn sababta hadalkiisa looga sii deyn waayey TV-ga Dowladda, isagoo yiri: “Ma aqaan sababta keeni karta tallaabadan is hortaagga ah . Laakin tani waxay billow u tahay waxa soo socda iyo duullaanka lagu yahay aragtida Xildhibaanka iyo tan siyaasiga”.
Kooxda Farmaajo uma kala harin difaaca Sheekh Shariif, waxaana xubnaha ka hadlay arrintan ak mida Xildhibaan C/llaahi Aadan Kulane “Jiis’ oo ahaa gacan-yarihii Farmaajo ayaa qoraalkiisa yiri: “Tillaabada lagaga hor-istaagay inay tabiso warbaahinta Qaranku hadal-jeedintii Baarlamaanka ee Madaxwaynihii hore Sharif Sheikh Ahmed, waa mid na tuseysa burburinta Hey’adaha Qaranka, u xuubsiibasho Kaligii Talisnimo iyo cabburin xorriyadda hadalka iyo fikirka. Waa ayaan darro wayn in Dastuurkiina uu Madaxwayne Hassan Sheikh Mohamud kaligiis badalayo, Afkaarta kasoo horjeedana uusan u adkeysan karin!”
Waxaa dagaalka Baraha Bulshada kusoo biiray Maxamed C/llaahi Farmaajo oo isna qoraal ku garab istaagay Sheekh Shariif, si cadna u sheegay inaan la aqbali karin hab dhaqanka SNTV, waxaana markaas kadib bilowday fal-celinta taageerayaasha Madaxweyne Xasan Sheekh.
Taageerayasha kooxda Xasan Sheekh wuxuu dagaalkooda baraha bulshada u badnaa dhinaca Farmaajo oo ay ku eedeeyeen inuu xilligan u doodayo baahin feker, halka uu isagu hore isugu dayey inuu khaarijiyo Sheekh Shariif iyo Xasan Sheekh.
Jawaabta ugu culus ee kooxda Xasan Sheekh, waxay ka timid Agaasimaha Wasaaradda Gaadiidka iyo Duulista Hawada Bashiir Macallin Cali oo soo qoray:
“Wax cod ah ma lihid, mana jirto qof aad codkaaga ku biirin karto ama aad wax usoo kordhin karto. Waxba Kama gashid howlaha socda ee wax kabadalka Dastuurka, Baarlamaankana waa midkii adiga kuu diiday codkiisa ee Madaxweyne u doortay Hassan Sheikh Mohamud. Lacag yar oo aad soo siiso midkoo maskiin ah Kadibna aad uso dirto inuu meelaha ka qeyliyo, taas nolol kuuma noqoto ee Kaalay imaaw Baarlamaanka dhaxdiisa haddii aad wax tari karto, Annaga Makarafoon hanoogusoo dhiibin ninkii aad shalay ku khaarijin rabtay Hotel Maida oo waliba Alle ka sokoow uu kaa badbaadiyay AUN Cali Jubba”.
Dagaalka Baraha Bulshada ayaa gaaray heerkii ugu xumaa, iyadoo dhacdo kasta looga faa’iideysanayo in lagu weerarro, lagu aflagaadeeyo ama ay ku xafiiltamaan taageerayaasha xag-jirka ah ee siyaasiyiinta iyo madaxdii hore.
Isbaheysiga mucaaradnimo ee cusub ayaa si rasmi ah u bilowday markii ay war-saxaafafeed wadajir ah soo saareen Sheekh Shariif iyo Farmaajo, kaasoo ku saabsanaa waanwaan ay ka dhex wadeen Madaxweyne Xasan Sheekh Maxamuud iyo Madaxweynaha Puntland Siciid Deni, iyagooXasan Sheekh ku eedeeyay fashilka Gogoshii Garowe.
