Hadal-heyn badan ayey dhalisay gabar Soomaaliya uga qeyb gashay tartanka Jaamcadaha adduunka oo shalay ka dhacay dalka Shiinaha, waxayna noqotay arrin ay dadweyne iyo mas’uuliyiin badan ka doodeen.
Baraha bulshada ee Soomaalidu ku xiriirto waxaa buux dhaafiyay eedeyn, maadsi iyo argtiyo ku saabsan gabadhan Soomaaliya ku metelaysay orodka gaaban oo u muuqatay mid aan u diyaarsaneyn tartan.
Nasra Abuukar Cali ayaa dadku siyaabo farabadan uga falceliyeen iyadoo lagu eedeeyey xukuumadda Dawladda Federaalka Soomaaliya in ay horseedeen guuldarrada Somaaliya.
Nasra ayaa aad uga dambeysay gabdhihii kale ee la tartamayay, taasoo dadka qaar ay ku tilmaameen halheys si weyn loo wadaagay oo ah “in Soomaaliya ay daba ordeysay dunida”.
Wasiirka Ciyaaraha Soomaaliya ayaa si degdega isla xalay uga falcelinayey xaaladda ka dhalatay arrintan ayaa sheegay inaysan Wasaaradiisa waxba kala socon, soona xulin gabadhaasi, isagoo iska fogeeyay eedaha loo jeediyay dowladda.
Waxaana uu sheegay in lala xisaabtami doono ciddii hawshaas ku shaqada lahayd. “Waxa ay ka qaybgalaysay tartanka jaamacada ee dalka Shiinaha sida ay noo sheegeen qolyaha gabadha halkaas u diray. Gabadhu waxay ka socotay jaamacadaha dalka. Nidaamka ay ku timid ee ay halkaa ku tagtay iyo hannaanka lagu soo xulay iyo ciddii soo xushayba waa hawl aan baadhitaan ka samayn doono oo guddi u saari doonno,” ayuu yiri wasiir Maxamed Barre Maxamuud.
Bishii July billowgeedii ayay ahayd markii warbaahinta ay ka soo muuqatay Nasra Abuukar oo sheegaysa in dalka China ay kaga qaybgeli doonto tartanka orodka.
Nasra ayaan lahayn wax taariikh orodyahannimo ah oo ka horreysa midda hadda, balse guddoomiyaha xiriirka ciyaaraha fudud ee Soomaaliya, Khadiija Aadan Daahir ayaa hore u sheegtay in ay qaadatay layliyo adag oo ay isugu diyaarisay ka qayb galka orodkaas boqolka mitir.
Dhanka kale ururka ay ka midaysan yihiin jaamacadaha Soomaaliya oo iska fogeeyay arrintan, iyagoo war ay soo saareen ku sheegay inaanu jirin orodyahan Soomaaliyeed oo ay u direen tartankaas.
Nasra ayaa ahayd arday jaamacadeed oo dhigan jitey jaamacadadda Jobkey. Waxaana ay jirtey da’aadda 20, xilli sannadkii 2003-dii ku dhalatay magaalada Muqdisho, halkaasna ku soo qaadatay waxbarashada hoose dhexe.
Qaybaha baraha bulshada kala duwan ayaa waxaa qabsaday muuqaal kooban oo ahaa markii ay Nasra ay ordaysay, kaas oo muujinaya sida ay uga danbeysey dhammaan tartamayaashii kale.
Dadka badan ee fikradahooda ka dhiibtay arrintan ayaa ku kala duwanaa cidda eeda leh, waxaana mid ka mid ah dadkaas uu sheegay “In walaasheen ayaysan xoog ku fuulin diyaaradda balse ciddii u dirtay halkan, ciddaasina u baahan tahay in lala xisaabtamo”
