Madaxweyne Xasan Shiikh Maxamuud khudbada uu maanta u jeediyay labada golle ee Baarlamaanka Soomaaliya si guud waxa uu u caddeeyay aragtida Dowladda ee hishiiskii (Is-Afgarad) ee ay kala saxiixdeen Hogaamiyaha waqtigiisu idlaaday ee Soomaaliland Muuse Biixi Cabdi iyo RW Itoobiya Aby Ahmed isaga oo carrabka ku adkeeyay in ay jirin cid bixin karta taako dhuleed oo ay Soomaaliya leedahay hadeey tahay Madax Maamul Goboleed iyo hadeey tahay Madaxda Dowladda Federaalka.
Marka laga soo tago go’aankii xukuumadda ee ay ugu yeertay Safiirkii Soomaaliya u fadhiyay Addis Ababa, hishiiska baadilka ah ee shalay dhacay sida uu u saameyn doono xiriirka siyaasiga ee labada dal ee Soomaaliya iyo Itoobiya Madaxweynaha ma sheegin iyo tallaabta xigta ee ay dowladdu arinkan ka qaadan doonto.
Madaxweynuhu sooma hadal qaadin kulankii Jabuuti ku dhexmaray isaga Muuse Biixi maalin ka hor hishiiska Addis lagu kala saxiixday inuu ogaa oo lala wadaagay iyo in ay la yaab ku noqotay oo uu ahaa Shirqool iyo raad tirasho Muuse Biixi u gaar aheyd.
Hadal jeedinta maanta waxa ay Madaxweyne Xasan Shiikh u noqon kartay fursad uu bulshada Soomaaliyeed uu ku mideeyo uuna ku tuso daciiftinimada Aby Ahmed iyo caqabadaha ka jira Itoobiyada kala qeybsan dhexdeeda ee uu doonayo inuu indhaha dadkiisa ka weeciyo ,isuguna muujiya inuu yahay halyay.
Waxa dhanka kale jira hishiiyo Is-Afgarad oo Xukuumadda FS ay had iyo jeer gasho oo aan la hor keenin Gollaayasha sharci-dajinta. Bisha hadda inaga dhamaatay ee Disember Wasiiradda Gaashaandhigga ee dalalka Itoobiya iyo Soomaaliya waxa ay kala saxiixdeen Hishiis Is Afgarad kaas oo Wakaalada Wararka Soomaaliyeed ee SONNA ay ku sheegaty in lagu xoojinayay iskaashiga difaaca iyo dadaalada wadajirka ah ee kor loogu qaadayo Nabadda iyo Amniga Geeska Afrika.
Waxa Xukuumadda ay horey u ansixisay hishiis ay kala saxiixdeen Soomaaliya iyo Imaaradka Carabta .Hishiiyo kale oo waxa jira ay galeen wasaarado xukuumadda ka tirsan kuwaas oo shacabka Soomaaliyeed aan laga siin wax macluumaad ah.
Soomaalidu waxa ay tiraahdaa wax la qariyo qurun baa ku jira ,xalaalna maalin cad baa la quutaa . Hadii uu jiro hishiis ay dan ugu jirto Soomaali banaanka waa in la soo dhigaa ,shacabkuna wuu taageerayaa wixii wanaag ah.
W/Q: Xildhibaan Maxamed Ibraahim Macalimuu
