Wasiirka Arrimaha dibadda Mareykanka oo socdaal ku maraya Bariga Afrika ayaa lagu wadaa inuu maanta socdaal ku yimaado caasimadda Soomaaliya ee magaalada Muqdisho. Socdaalka Kerry ee Muqdisho ayaa noqon doona kii ugu horeeyay ee noociisa ah ee wasiir arrimo dibadeed reer Mareykan ah ku yimaado Soomaaliya muddo ka badan 25 sanadood.
Booqashada John Kerry ee Muqdisho ayaa la sheegay inay noqon doonto mid saacado kooban qaadata oo aanu gudaha magaalada soo geli doonin wafdigiisa, balse kulamada uu la yeelanayo madaxda dowladda Federaalka ay ka dhici doonaan garoonka diyaaradaha Muqdisho degaanka Xalane ee sida weyn loo ilaaliyo.
[ad name=”HTML-1″]
Madaxweynaha dowladda Federaalka Soomaaliya iyo Ra’iisal wasaare Cumar C/rashiid iyo xubno ka tirsan golayaasha wasiirada iyo Baarlamaanka ayaa la kulmi doona wafdiga wasiirka arrimaha dibadda Mareykanka, iyagoo ka wadahadli doona xaaladda Soomaaliya iyo dagaalka lagula jiro kooxda Alshabaab.
Ciidamo Mareykan ah oo tiradoodu boqolaal tahay ayaa ku sugan garoonka diyaaradaha Muqdisho iyadoo la filayo in ciidamo kale ay la socon doonaan wafdiga wasiirka arrimaha dibadda Mareykanka John Kerry, waxaana ammaanka garoonka diyaaradaha la filayaa inay la wareegaan ciidamada Mareykanka inta uu halkaas joogo wasiirka.
Goobjooge.com
[ad name=”HTML”]
[ad name=”HTML-6″]
