Kadib markii ay Wasaaradda Waxbarashada Soomaaliya shaacisay natiijooyinka imtixaankii shahaadiga ahaa ee dugsiyada sare 2021 ayaa waxaa soo baxay in Gobolka Banaadir uu mar kale noqday midka ugu hooseeya waxbarashada.

Natiijada Imtixaanka Dugsiyada Sare oo ay ka qeyb galeen 34,908 arday oo ku kala sugan gobolka Banaadir, iyo maamul goboleedyada Jubaland, HirShabelle, Galmudug iyo Koonfur Galbeed Ardayga hartay ama dhacday waxay 94% yihiin ardayga Dugsiyada Gobolka Banaadir.

Waxaa imtixaanka ku haray 4,646 oo arday, ama 13.3% ardaydii gashay, kuwaas oo badankood ah ardayda dugsiyada gobolka Banaadir. Sidoo kale waxay 2 Dusgi oo kaliya ku leeyihiin 30-ka Dugsi ee ugu fiican Imtixaanka.

16-ka Arday ee ugu horeeya imtixaanka Dugsiyada sare sanadkan 2021 oo galay 10-ka kaalin ee ugu horeyay, wuxuu Gobolka Banaadir ku leeyahay 3 Arday oo kaliya oo kala galay kaalimah 2-aad, 4-aad iyo 7-aad.

Mar kale wuxuu Gobolka Banaadir noqday Gobolka ay ku yaallaan dugsiyada ugu liita imtixaanka, waxaana 100 Dugsi ee ugu hooseeya imtixaanka uu ku leeyahay 95 Iskuul.

Wasiirka Waxbarashada ayaa ku hanjabay in Dugsiyada saddexdii sano ee ugu danbeeyay ardaydoodu dhaceysay iyo Iskuulada aan dhigin fasaladda 1-aad iyo 2-aad ee Dugsiga Sare ay tallaabo ka qaadi doonaan.