Ciidamada Ruushka ayaa ka dagaalamaya gudaha magaalada Caasimadda u ah dalka Ukraine, waxaana ilaa xalay socday duqeymo iyo dagaal toos ah oo dhex maraya ciidamada Ruushka iyo ciidamada Ukraine.
Wararkii ugu danbeeyay waxay ciidamada Ruushku duqeeyeen saldhigyada ciidamada Ukraine, Dhismooyin iyo Garoonka Diyaaradaha, waxaana ka mida Daar dheer oo Gantaal uu qabsaday, iyadoo mas’uuliyiinta Ukraine ay sheegeen in Dhismahaasi uu ahaa mid ganacsi iyo guryo dad shacab ah ay degan yihiin.
Dagaal culus ayaa ka socda waddooyinka, waxaana Qaraxyo waaweyn ka dhaceen gudaha caasimadda iyo nawaaxigeeda. Waa markii ugu horeysay oo qaraxyo toos ah iyo dagaallo toos ah oo culus ay ka dhacaan Gudaha magaalada Kiev.
Maamulka Magaalada Kiev ayaa shaaciyey in la joojiyey shaqadii Tareenada dhulka Hoostiista mara, iyadoo goobahaasi loo bedelay meelo ay dadka ka galaan qaraxyada iyo madaafiicda socota. Sidoo kale waxaa bandow lagu soo rogay caasimadda Kiev laga bilaabo 5-ta galabnimo ilaa 8:00 subaxnimo, iyadoo cid kasta oo socota loo qaadan doono inay tahay caddow.
Arrintan ayaa ka danbeysay kadib markii si lama filaan ah ay ciidamo ka tirsan Ruushka ku galeen xaafado ka mida magaalada Kiev, iyadoo dagaallo culus oo wadooyinka ka dhacay ay la galeen ciidamada Ukraine.
Ciidamada Ruushka ayaa isku dayaya inay qabsadaan caasimadda Ukraine, laakiin waxaa difaac kala hortegay ciidamada dalkaasi, waxayna xaalada isku bedeshay dagaal hareeyay caasimadda Kiev, iyadoo dadka shacabka ah loo qeybiyey hub si ay isu difaacaan.
Ilaa shan dhinac ayey ciidamada Russia ka weerarrayaan magaalada Kiev, iyadoo dagaalku dhaliyey burbur xoog leh oo gaaray dhismooyinka shacabka. Madaxweynaha Ukraine Volodymyr Zelensky ayaa beeniyey inuu ka tegay caasimadda, wuxuuna soo bandhigay muuqaalka isagoo wadooyinka magaalada la jooga ciidamada difaacaya.
Waxay dagaallo culus ka socdaan dhammaan magaalooyinka Dalka Ukraine oo dhan, iyadoo ciidamo hor leh oo fara badan ay Ruushku ku daabulayaan dalka Ukraine, xilli ay socoto dagaal weyn oo Ruushku ku qaaday dalka UkrainÄ™.
Sirdoonka Maraykanku ayaa laga soo xigtay in qorshaha uu yahay in ciidamada gaarka ah ee Ruushka ay gudaha u soo galaan, ayna la wareegaan garoomada Diyaaradaha ee Sikorsky iyo Boryspil, kaasoo ay u isticmaali doonaan in lagu daabulo ciidamo aad u tiro badan oo gaaraya ilaa 10,000 oo askari kuwaas oo geli doona caasimadda Ukraine.
Howsha ugu culus ee ciidamada Gaarka ah ee Ruushka ayaa noqon doonta inay galaan magaalada Kiev, ayna soo qabataan Madaxweyne Zelensky, wasiiradiisa, iyo baarlamaanka, ka hor inta aan lagu qasbin inay saxiiaan heshiis nabadeed oo gacanta u geliya xukunka dalka Ruushka ama nidaamka taageersan.