Wararka laga helayo Gobolka Sh/hoose ayaa sheegay in qarax lagu dilay laba ka mida taliyeyaasha sare ee ciidamada Milateriga Soomaaliya.
Qarax Miino oo aad u culus ayaa lala beegsaday Gaari ay la socdeen taliyihii guutada 12-ka April G/sare C/salaan Aadan Kurjow iyo C/sare C/raxman Jimcaale Muse oo dhinaca maaliyadda uqaabilsanaa Guutada, iyagoo qarax ku dhintay; wuxuuna qaraxu ka dhacay degaanka Dhannaane oo ahaa isla goobtii lagu dilay taliyihii hore ee Guutada Gen. Cumar Dheere.
Col. Abdisalam Adam Kurjow ayaa la magacaabay 26-kii Disember 2018, 20 maalmood kadib markii uu qarax ku dhintay taliyihii xilka uga horeeyay oo la qarxiyey 6-dii Disembar, wuxuu isaguna ku dhintay isla degaankii iyo qarax kale oo la sheegay inay Alshabaab u dhigtay.
Qaraxyada lagu dilay taliyeyaasha guutada ugu muhiimsan ciidamada Milateriga muddo 2 bilood gudadood ah ayaa muujineysa halista heysata ciidamada xoogga dalka oo maraya halkii ugu hooseysay sirdoon ahaan, waana markii ugu horeysay ee Alshabaab ay beegsato saraakiil heerkaas ah.
