Wararkii ugu danbeeyay ee Madaxtooyada Soomaaliya ayaa sheegaya in Liiska Golaha Wasiirada cusub la dhameystiray, lana filayo in lagu dhawaaqo saacadaha soo socda.
Waxaa hadda soo shaac baxaya xubnaha ka mid noqon doona Golaha Wasiirada cusub ee Ra’iisal wasaare Xamza Cabdi Barre ku dhawaaqi doono, kadib muddo bil ka badna oo xilkaasi uu ku magacaaban yahay.
Ra’iisal wasaare ku xigeenka Xukuumadda cusub ayaa la xaqiijiyey inuu noqon doono madixii Shirkadda Dahab-Shiil ee Koounfurta iyo Bartamaha Soomaaliya Xasan Cabdi Cawad oo lagu dhawaaqay inuu xilkii shirkadda ka tegay, dhowr jeerna la-tashi u tegay Madaxtooyada Somaliya.
Dhinaca kale wasiirada kasoo muuqan doona Xukuumadda Xamza Barre ayaa waxaa ka mida: Axmed Macallin Fiqi oo la filayo inuu noqdo Wasiirka arrimaha Gudaha iyo Federaalka, isagoo qaadan doona xilka Wasiir Beesha H/Gidir oo dood badan ka taagneyd iyo Maxamed Sheekh Cali Doodishe oo lagu wado inuu noqdo wasiirka Qorsheynta ama Arrimaha dibadda.
Halkan ka akhriso: Madaxweyne Xasan Sheekh oo Wasiirada Beesha Hawiye kasoo xushay Xisbigiisa UPD
Siyaasiga Cali Xaaji Warsame ayaa isna lagu wadaa inuu ka mid noqdo Golaha Wasiirada cusub oo la siiyo jagada ugu weyn Beesha uu kasoo jeedo. Dhinaca kale Prof Cilmi Maxamuud Nuur oo tirsanaa xisbiga UPD ee Xasan Sheekh ayaa la filayaa inuu noqdo Wasiirka Maaliyadda, isagoo bedeli doona C/raxmaan Beyle.
Wasiirada inta badan waxaa qortay Madaxweyne Xasan Sheekh oo markan caddeeyay inuu Golaha wasiirada kusoo dari doono dad uu ku kalsoon yahay, iskuna hubo, waxaana saameyn kooban ku leh Ra’iisal wasaare Xamsa Cabdi Barre.
Arrimaha ugu waaweyn ee dib u dhigay ku dhawaaqista Golaha Wasiirada cusub ayaa waxaa ka mida safarrada badan ee Xasan Sheekh iyo awood qeybsiga beelaha oo waqti dheer u baahday si loo maareeyo wasiirada muhiimka ah.
