Baraha Bulshada Soomaalida ku xiriirto ayaa si weyn loogu faafiyay warka ku saabsan shilka uu magaalada Istanbuul ee dalka Turkiga ku galay wiil uu dhalay Madaxweynaha Soomaliya.
Shilka oo dhacay 30-ka November ayaa la ogaaday aakhrikii toddobaadkan, waxaana siyaabo kala duway loga hadlay shilka iyo xogta la xiriirta, balse waxana warbixintan ku eegeynaa xaqiiqada shilkasi oo aanu kasoo xiganay Warbaahinta Turkiga.
Duhurnimo Khamiis ah ayuu dhacay shilka markii Mooto uu watay nin lagu magacaabi jiray Yunus Emre Göçer uu ku dhacay Gaari uu waday Maxamed Xasan Sheekh Maxamuud, oo ah wiil uu dhalay Madaxweynaha Soomaaliya.
Göcer ayaa wadadda ka tuurmay markii uu Gaariga ku dhacay, waxaana soo gaaray dhaawac culus oo keenay inuu u dhinto, markii isbitaallada wax ka qaban waayeen xaaladiisa adkeyd darteed.
Ninka dhaawac u geeriyooday ee Yunus Emre Göçer wuxuu ahaa aabbe dhalay laba carruur ah. Maxkamadda Istanbul ayaa Wiilka madaxweynaha Soomaaliya Maxamed Xasan ka mamnuucday inuu Turkiga ka baxo.
“Wiilkeygu wuxuu ahaa nin xirfad leh oo kaxeeya mootada. Wiilkayga waa la dilay, ma ahayn shil. waxaan rabaa cadaalad Waxaan rabaa in cid kasta oo darawalkii wiilkayga ku dhuftay in la ciqaabo. Ma doonayo in dhacdadan la qariyo” ayuu yiri Metin Göçer oo ah aabbihii dhalay Ninka shilka ku dhintay.
Wuxuu sheegay in Darawalkii gaariga uu 100% isaguu qaladka lahaa, taasoo ay muujisay Cameada CCTV, isla markaana wiilkiisa aanu wax khalad ah sameynin, sida uu yiri.
Qreenka u doodaya Reerka uu ka dhintay Yunus Emre Göçer ayaa isna sheegay in eedeysanaha la sii daayay, haddana uu nooca dembigu isu beddelay mid kas ah, sida uu qabo qareen İlyas Çimen.
Wuxuu sheegay Qareenka inay hadda sugayaan in la soo xiro tuhmanaha oo ah wiil uu dhalay Madaxweynaha Soomalaiya, iyagoo dacwadooda u gudbinay xeer ilaaliyaha ay qusayso.
Maxamed Xasan Sheekh Maxamuud ayaa la sii daayey kadib markii laga duubay hadal ku saabsan sida uu shilka ku galay, balse waxaa lagu wargeliyay inuusn ka bixi karin Turkiga.
Wararkii ugu danbeeyay ayaa sheegaya in Xeer ilaalinta Turkiga ay warkii ugu horeysay kasoo saartay kiiska Wiilka Madaxweynaha Soomaallya, isagoo qoraal uu soo saaray ku sheega in 2-dii bishan Disembar Maxamed Xasan Sheekh laga saaray dalka Turkiga.
Wuxuu intaas raaciyay in dowladda Turkiga ay adeegsaneyso qaab kasta oo fududeynaya in lasoo celiyo, eedeynsanaha falkan geystay, sida uu sheegay Xeer Ilaaliyaha guud ee Turkiga.
