Wararka laga helayo madaxtooyada Soomaaliya ayaa sheegay in lagu kala tegay wadahadalkii u dhaxeeyay Madaxweynaha Soomaaliya iyo Gudaha Baarlamaanka.
Kadib kulan qaatay in ka badan saacad oo galabta dhex maray Madaxweyne Maxamed C/llaahi Farmaajo, Guddoomiyaha Baarlamaanka Maxamed Sheekh Cisman (Jawaari) oo uu wehliyo ku xigeenkiisa Mahad Cabdalla Cawad ayaa wax natiijo ah lagu gaarin kadib markii guddoomiye Jawaari ku adkeystay inuusan diyaar u ahayn tanaasul.
Guddoomiye Jawaari oo xalay ka baaqsaday kulan uu la balansanaa ayaa madaxweyne Framaajo u sheegay inuu doonayo waanwaan lagu dhammeeyo khilaafka Baarlamaanka ee labada Garab u kala qeybsan iyo in la heshiisiiyo isaga iyo ku xigeenkiisa koowaad C/weli Muudey, kadibna kulan isugu yimaadaan Baarlamaanka, halkaasoo uu go’aankiisa ka jeedin doono.
Ugu danbeyn shirka ayaa lagu kala tegay, iyadoo aanay wax natiijo ah kasoo bixin, ayna socon waayeen dhammaan rajadii laga qabay inuu guddoomiye Jawaari tanaasulo, taasoo keentay inuu madaxweynaha soo gabagabeeyo dadaalkii nabadeed ee uu ka dhex waday Baarlamaanka.
