Olole siyaasadeed iyo loolan muddo soo socday ayaa soo gabgaboobay, kadib markii Jufo ka tirsan Beesha Mareexaan ay dib u hantisay Kursi ay hore Jufo kale uga qaadatay, balse musharaxa kursigaasi waxaa la wareegay madaxweynaha waqtigiisu dhammaaday ee Maxamed C/llaahi Farmaajo.
Arintan waxay salka ku heysay loolan u dhaxeeyay Maxamed C/llaahi Farmaajo iyo Cali Daahir Ciid, kuna saabsanaa in jufada Madaxweyne ku-xigeenka Galmudug ay dib u soo ceshato kursi Golaha shacabka oo laga boobay, kaasoo uu xilligan ku fadhiyey xildhibaan C/shakuur Cali Mire oo ka mida la-taliyeyaasha ugu dhow Farmaajo.
Cali Daahir Ciid wuxuu ku fashilmay inuu kursigii Golaha shacabka u soo celiyo Jufadiisa, balse taas bedelkeed wuxuu soo dhiciyey, kuna guuleystgay Kursi ka tirsan Aqalka sare, iyadoo uu Farmaajo qorsheeyay in meesha laga saaro Senator C/waaxid Cilmi Goonjeex, halkii uu weyn lahaa C/shakuur Mire.
Loolan labaad oo ahaa cidda kusoo baxeysa kursiga Aqalka Sare ayaa mar kale ka dhex bilowday Farmaajo iyo Cali Ciid, waxaana kursiga la wareegay oo musharax la yimid Farmaajo, kadib markii uu gacan weyn ka helay madaxweynaha Galmudug Axmed Qoorqoor.
Liiskii uu xalay soo saaray Qoorqoor waxaa kursigan la siiyey musharax Cabdi Cusmaan Xareed oo Farmaajo uu keensaday (Kaasoo kusoo baxay Kursiga) , waxaana sidaasi macnihii kursiga looga qaatay madaxweyne ku xigeenka Galmudug oo musharax ahaan u watay C/weli Ibraahim Garyare oo ka tirsan mucaaradka.
Farmaajo wuxuu sidaa ku heystaa laba guul oo ah inuu difaacay kursiga la-taliyihiisa C/shakuur Cali Mire, dhinaca kalena uu musharax taageersan geystay Kursigii C/weli Goonjeex oo lagu xaliyey Jufada Madaxweyne ku-xigeenka Galmudug.
Cali Daahir Ciid wuxuu heysta hal guul oo ah inuu jufadiisa u soo dhiciyey kursi Baarlamaan, haba ahaado Aqalka Sare, balse wuxuu haleeli waayey inuu aayaha kursiga tolkiisa ka taliyo, iyadoo ay kala wareegtay madaxtooyada Soomaaliya.
