Laba ka mida xildhibaanadii ololaha weyn u galay in xilka laga qaado Guddoomiyihii hore ee Baarlamaanka Soomaaliya Prof. Maxamed Sheekh Cismaan (Jawaari) ayaa lagu abaal mariyey jagooyin wasiir oo ay ka heleen xukuuumadda Soomaaliya.
Wareegtadii maanta kasoo baxday Xafiiska Ra’iisal Wasaaraha ayaa xilal wasiirnimo loogu magacaabay xildhibaan C/llaahi Goodax Barre iyo Xuseen Maxamuud Sheekh Xuseen (Badni) oo ahaa xildhibaanadii hoggaaminayey ololihii xil ka qaadista Guddoomiye Jawaari oo si weyn loogu bartay weerarka shaqsiga ah ee ay warbaahinta u marin jireen.
Xildhibaan C/llaahi Goodax Barre oo ahaa taageeraha ugu weyn ee dowladda madaxweyne Farmaajo iyo saaxiib u dhow labada xafiis ee Madaxweynaha iyo Ra’iisal wasaaraha ayaa lagu tilmaamay weeraryahan culus oo kusoo biiray kooxda Nabad & Nolol sida uu baraha bulshada ku baahiyey wasiirka Dastuurka C/raxmmaan Xoosh Jibriil.
H.E Abdullahi Godah Barre ( Messi) has joined team #NabadIyoNolol. It cannot get any better. Congrats buddy. #IsooMareey # Adam Isak https://t.co/qzR60A7gzY
— Abdi Hosh (@HoshAbdi) August 5, 2018
Xildhibaan Xuseen Badni oo ah nin aad ugu dhow Shariif Xasan ayaa loo arkaa mid madaxda dowladda ay ku fulinayaan balanqaadyo hore oo laga qaaday madaxweynaha maamul Goboleedka K/Galbeed.
In C/llaahi Goodax Barre ku biiro Xukuumadda Kheyre ayaa loo arkaa laba khasaare oo ku imaan karta dowladda hadda jirta, iyadoo marka hore ay weynayaan xildhibaan cod dheer oo ka dhex difaaca Baarlamaanka iyo inuu yahay qof aan la xakameyn karin oo la hubo inuu ku laaban doono taariikhdii uu dhigay markii uu wasiir ka noqday dowladii Xasan Sheekh.
