Ku dhowad 50 xildhibaan oo ka tirsan Baarlamaanka Federaalka Soomaaliya ayaa maanta shir ku yeeshay magaalada Muqdisho, waxayna ka digeen inay hor istaagi doonaan kulanka Berri labada Aqal ee Baarlamaanka yeelan doonaan.
Xildhibaannadan oo u badan taageerayaasha madaxweynayaashii hore ee Maxamed C/laahi Farmaajo iyo Sheekh Shariif ayaa waxaa kaloo weheliya xildhibaanno kale oo uu ka mid yahay C/raxmaan C/shakuur, waxayna si cad u sheegeen in kulankaasi iyo ujeedkiisa ay ka hor jeedaan.
Waxay xildhibaannadan ku doodayaan inaan wax ka beddelka Dastuurka la geli karin inta laga he;ayo xeer ay labada gole ee Baarlamaanka ku wada shaqeeyaan oo aan intii uu jiray Golaha la sameyn.
Kulanka Berri ayaa ku saabsan in la ansixiyo hannaanka loo marayo wax-ka bedelka Dastuurka, iyadoo xildhibaannada labada Aqal ee Baarlamaanka la qorsheeyay inay gacantaag ugu codeeyaan qaabka loo ansixinayo Qodobadda Dastuurka marka ay xildhibaannadu ka doodayaan.
Madaxweyne Xasan Sheekh oo qorshahan gadaal ka riixaya iyo xukuumadda Ra’iisal Wasaare Xamase Cabdi Barre ayaa sidoo kale taageero ka heysta Guddoonka labada Aqal ee Baarlamaanka, balse waxaa si weyn uga horjeeda musharixiintii Madaxweynaha iyo taageerayaashooda.
“Waxaan dadka Soomaaliyeed ku marag gelinaynaa in madaxda qaranka ee fulinta iyo guddoonka labada gole qaadayaan masuuliyadda wixii ka yimaada ficillada lagu qaybinayo ummada Soomaaliyeed xiligii ay midnimo ugu baahi badnayd” ayuu yiri Xildhibaan C/raxmaan C/shakuur oo ka mida ahaa xildhibaannadii mucaaradka ee maanta shiray.
Xidhibaan Saadaq C/llaahi ayaa isna ku hanjabay inay awood adeegsan doonaan isagoo fariin uu qoray ku yiri: “Sharci haddii la diidey shanta kaliya bannaan”.
Xildhibaanno badan oo mucaarad ah ayaa ku adkeysanaya inay awood adeegsan doonaan si ay kulanka Berri u joojiyaan ama fowdo uga abuuraan, halka xildhibaannada taageersan xukuumadda iyo Madaxweynaha ay ku doodayaan in waxa la ansixinayo uu yahay Habraaca Wax-ka-beddelka Dastuurka sida loo mareeyo hannaanka kulamada wadaagga ah ee labada aqal, isla markaana uu waafaqsanyahay Dastuurka KMG ah.
