Wasiirka Amniga Xukuumadda Federaalka Soomaaliya Maxamed Axmed Sheekh Cali ayaa ka hadlay xaaladda Gobolka Gedo iyo xiisadda ka taagan maamulka cusub ee uu soo magacaabay Madaxweynaha Jubbaland.
Wasiirka ayaa sheegay in ay dhibaatada ka jirta ka dhalatay Doorashadii 2019, isla markaana uu bannaanka ka taagnaan doono Maamulka Jubbaland inta Doorasho laga qabanayo.
“Gobolka Gedo waa lagu diriray, waxaa loogu dirirayna waa Doorasho sababteed.. sidii 2019kii uu bannaanka u taagnaa ayuu bannaanka u tagnaanayaa illaa doorasho intay dhacdo Axmed Madoobe uu meesha ka tago..” ayuu si cad u yiri Wasiirka oo taageeray dadka Gobolka Gedo.
Warkan oo ka mid ahaa hordhac Wareysi uu Wasiirku siiyey telefishinka SMS ayuu sidoo kale ugu jawaabay Madaxweynaha Puntland oo dhowaan ka hadlay xaaladda Gedo. “Shalay’ Siciid Deni’ Dawladda Federaalka oo taageeraysa Gobolka Gedo ayuu gacan siinayay maamulka Jubbaland oo Madaxweynaha Dawladda Federaalka ayuu kula loolamayay arrinta Gedo.”
Hadalka kasoo yeeray Wasiirka Amniga oo ah mas’uulka ugu sareeya ee dowladda Federaalka ku metela Dadka Reer Gedo ayaa loo arkaa culeys kale oo heysta dowladda Soomaaliya oo madaxdeeda ay taageersan yihiin Maamulka Axmed Madoobe.
