Wasaaradda Caafimaadka xukuumadda Somalia iyo maamulka Gobolka Banaadira ayaa isku heysta kharashka laga helo ‘Buugga caafimaadka’, kaasoo muhiimadiisu soo baxdo xilliga uu xajku soo dhowaado.

Gobolka Banaadir ayaa dhowaan sheegay inay diyaariyeen Buugga caafimaadka ee ay qaateen dadka safraya, iyadoo qof waliba oo safraya lagu kusoo rogay amar ah inuu qaato buuggaas oo markii hore ay wasaaradda caafimaadka diyaarin jirtay, waxaana dhowaan shuruud looga dhigay inay qaataan dadka qaadanaya Leysinka wadista baabuurta.

Qoraal maanta kasoo baxay wasaaradda caafimaadka xukuumadda Soomaliya ayaa isna lagu sheegay in Wasaaradda caafimaadka ay diyaarisay buug caafimaad, shaqaale iyo qalabkii loogu talo-galay in loogu adeego xujeyda Soomaaliyeed.

“Qoraalka waxaa ku jirtay in wasaarrada Caafimaadka iyo Daryeelka Bulshada ayaa lagu sheegay qodobadda soo socda:

1. Wasaaradu waxay diyaarisay shaqaalihii, agabkii iyo goobihii ay ka heli lahaayeen adeegyada caafimaakda ee musaafirku u baahanyahay

2. Wasaaraddu waxay diyaarisay tallaalada asaasiga ah ee looga baahanyahay musaafirka iyada oo la tix-raacayo xeerarka caalamiga ah ee caafimaadka isu gooshka ( IHR 2005 ),

3. Wasaaraddu waxay adeeg caafimaad oo baaritaan ah u samayn doontaa xujayda sanadkaan nasiibka u yeeshay inay booqdaan baytka Alle, si loo hubiyo bad qabka xaajiga, isla markaana loola socdo xaaladda dadka qabi karo cudurrada daba dheerada sida (sokorta, dhiigkarka ),

4. Wasaaraddu waxay xujayda siin doonta tallaalada asaasiga ah ee looga baahanyahay xaajiga intuusan safrin ka hor iyadoo la tixraacayo shuruudaha ku xusan warqada Wasaaradda Caafimaadka Boqortooyada Sucuudigu la soo wadaagtay Wasaaradda Caafimaadka Federalka Soomaalya

5. Wasaaraddu waxay siin doonta xujayda buug caafimaadka kadib marka la siiyo tallaalada asaasiga ah

6. Iyada oo kala shaqaynayso Wasaaradda Owqaafta iyo Arrimaha Diinta, waxay Wasaaradda Caafimaadku hubin doontaa in xaajiga uu helo adeeg caafimaad inta lagu guda jiro xajka, iyada oo la hubin doono inay la socdaan xujayda xirfadlayaal caafimaad oo ka war-qaba caafimaadkooda.

Guddoomiyaha Gobolka Banaadir C/raxmaan Yariisow ayaa baraha bulshada ku weerarray wasaaradda caafimaadka isagoo maseyr iyo xaasidnimo ku tilmaamay buugga caafimaad ee wasaaradda caafimaadka ay diyaarisay.

C/raxmaan Yariisow ayaa ereyo ayaa qoraalkiisa ku yiri: “Waa nasiibdaro in Wasaarada Caafimaadka DFS ay ka maseyrto Maamulka G/Banaadir oo ay si xaasidnimo u dhaqanto. Weligeedba Caafimaadka Aasaasiga iyo Buuga Caafimaadka waa mas’uuliyada G/Banaadir iyo dhammaan dhaqangelinta howlaha Caafimaadka, halka Wasaaradu ay mas’uul ka tahay Siyaasada heer Qaran ee Caafimaadka Dhammaan gobolada…”.

Dad badan ayaa Yariisow ku dhaliilay inuu baraha bulshada kusoo bandhigo arrimo ka dhaxeeya maamulkiisa iyo xukuumadda Soomaaliya.