Ururrada Saxafiyiinta ee SJS iyo SOMA Wasiir ku xigeenka Wasaaradda Warfaafinta xukuumadda Federaalka ku eedeeyay inuu ka danbeeyo xariga iyo dhibaatadda Xoghayaha ururka SJS Cabdalla Axmed Muumin.
Qoraal caawa kasoo baxay ururradan ayey ku cambaareeyay xarigga lagu sii hayo Cabdalle Axmed Muumin oo ah Xoghayaha Guud ee Ururka Suxufiyiinta Soomaaliyeed oo weli ku xiran xarunta CID-da, waxayna ku baaqeen in si shuruud la’aan ah lagu sii daayo.
“Ururrada SJS, SOMA iyo SMSJ waxay cambaareeynayaan ujeeddooyinka gurracan ee Wasaaradda Warfaafinta Soomaaliya ay ku doonayso inay ku xakameyso Xorriyadda Saxaafadda iyadoo loo adeegsanayo caga-jugleyn, hanjabaad iyo xarig aan loo meel dayin, gaar ahaan Wasiir ku-xigeenka Wasaaradda Warfaafinta C/raxmaan Yuusuf Al-Cadaala oo ah hormuudka caburinta Saxaafadda, isla markaana ka dambeeyay dhibaataynta Cabdalle Axmed Muumin” ayaa lagu yiri qoraalka.
Guddoomiyaha ururka SJS Maxamed Ibraahim ayaa yiri: “Waxaan la soconaa in Wasiir ku xigeenka Wasaaradda Warfaafinta C/raxmaan Yuusuf Al-Cadaala iyo Mas’uuliyiin ka tirsan Villa Somalia ay ka dambeeyaan dhibaatadii Cabdalle lagula kacay, iyaga kaliya ayaa mas’uuliyadeeda qaadi doona. Waxaan ugu baaqaynaa saaxiibada Soomaaliya ee caalamiga ah inay cunaqabatayn ku soo rogaan isaga iyo shakhsiyaadka kale ee ku xad-gudba xuquuqda suxufiyiinta iyo xorriyadda warbaahinta dalka”
Xoghayaha Guud ee Ururka Warbaahinta Soomaaliyeed (SOMA) isna baaqiisa ku yiri: “Maxamed Cismaan Makaraan: “Waxaan aad uga naxsannahay tabahan cusub ee ay wado Wasaaradda Warfaafinta oo ay ka soo saartay siyaasad ujeeddadeedu tahay handadaada iyo caga-juglaynta warbaahinta madaxa-banaan iyo suxufiyiinta, waxaana ugu baaqaynaa in dowladdu ay ixtiraamto xorriyatul-qawlka ee uu qeexayo dastuurka federaalka, waana in la siiyo ilaalinta ku habboon”.
Wasiir ku xigeenka Warfaafinta C/raxmaan Yuusuf Al-cadaalla ayaa mar kiiskan wax laga weydiiyey ka gaabsaday , isagoo sheegay in kiis Maxkamadda horyaalla aanu ka hadli karin, balse waa mas’uulkii soo saaray Amarka loo heysto inuu jabiyey Weriye Cabdalla Muumin.
Xarunta CID-da ayaa labo jeer maxkamad hor geysay waxayna kusoo oogeen eedo ku saabsan: Qodobka 219-aad, Qodobka 321-aad iyo qodobka 505aad ee xeerka ciqaabta Soomaaliyeed.
Maxbuus Cabdalla Muumim waxay Maxkamadu dammaanad kusii deysay 16-kii Oktoobar, 2022, balse mar kale 18-kii October, 2022, ayaa Cabdalle mar kale laga qabtay Garoonka diyaaradaha xilli uu arrimo caafimaad u socday Nairobi.
