Inta badan ganacsigii Suuqa ugu weyn Soomaalida ee Bakaaraha ayaa xiran, kadib markii ay dowladda Federaalka Soomaaliya soo rogtay Canshuurta iibka 18-kii bishan.
Dowladda Federaalka Soomaaliya ayaa dooneysa inay si qasab ah ku dhaqan geliso Canshuurta IIBKA, waxaase diidmo kala hor yimid Ganacsatada Muqdisho, iyadoo jaha-wareer ka dhashay qaabka loo qaadayo iyo cidda laga qaadayo.
Labadii maalmood ee ugu danbeeyay waxa socday bannaanbaxyo iyo shaqo joojin qeyb ahaan ka dhacday Suuqa Bakaaraha oo lagu diidan yahay canshuurtan, inkastoo dowladda ay sheegtay inay heshiis la gaartay Ganacsatada.
Xogta laga helay Ganacsatada ayaa sheegeysa in dowladda Federaalka ay bilowday inay ciidamo u adeegsado fulinta Canshuurtan, waxaana goobaha Ganacsiga ee furan lagu arkay ciidamo ka tirsan Dharcadka NISA oo ku wareegaya, si ay u hubiyaan inay shaqeyneyso canshuurtan.
Inta badan Ganacsatada Muqdisho ayaa helay qaab ay uga baxsadaan Canshuurta ee dowladda Xasan Sheekh soo rogtay, waxayna la yimaadeen xeelad ah inaysan isticmaalin Akoonada Ganacsiga.
Dadka wax iibsanaya ayaa dhinacood la yimid xeelad ah inaysan lacag ku bixin Akoon Ganacsi, halka dadka qaarkood ay lacago Kaash ah adeegsanayaan, waxayna dadweynaha iyo Ganacsatada ka siman yihiin inay intii suuragal ah ka baxsadaan Canshuurtan.
Heshiiska lagu qaabayo Canshuurtan ayaa dhex maray Wasaaradda Maaliyadda iyo Ganacsatada, waxayna canshuurtan ka go’eysaa Qofka wax iibsanaya, balse wax saameyn ah kuma yeelaneyso Ganacsadaha, taasoo ka dhigan iyo labadii awood ee dowladda iyo ganacsatada ay u heshiiyeen IIBSADAHA.
Cabsida ganacsatada heysa ayaa ah in wax iibsigu uu si weyn hoos ugu dhaco, halka Ganacsatada qaarkood aysan fahamsaneyn Canshuurta Iibka.
In ciidamo loo adeegso canshuur dadka lagu qasbayo xilligan waxay kaliya dhalin kartaa inuu sii xumaado xiriirka dadka iyo dowladda Madaxweyne Xasan Sheekh oo sumcadeeda si weyn hoos ugu dhacday.
Waxay kaloo Canshuurtan abuureysaa culeys dhaqaale, Suuq fadhi iyo khalkhal ku yimaada Ganacsiga guud ee dalka.
