Madasha Siyaasadda Puntland oo ay ku jiraan madax hore iyo siyaasiyiin caan ah oo 14-15-kii May 2023 shir ku yeeshay magaalada Garowe ayaa uga digay Madaxweynaha Puntland Siciid Deni inuu qabto Doorasho aan heshiis lagu ahayn.
Shirkan aaladda fogaan aragga (Zoom) uga qeyb galay Ra’iisal wasaarihii hore ee Soomaaliya Cumar Cabdirashid Cali Sharmaake iyo Senator Cabdiraxmaan Maxamed Maxamuud Faroole. Waxaana shirka lagu falanqeeyay geedi-socodka dimuqraadiyadda Puntland, gaar ahaan doorashada golayaasha deegaanka.
Sidoo kale waxaa shirku dul istaagay isku dayga xukuumadda Puntland ay ku doonayso wax-ka-bedelka dastuurka Puntland iyo duulaanka magaalada Laascaanood.
Shirku isku-raacay go’aamada hoos ku xusan:
1- Inta laga helayo doorashooyin loo dhan yahay kuna dhisan dastuurka, xeerarka kale ee Puntland iyo habraacyada doorashooyinka, shirku wuxuu ugu baaqayaa xukuumadda Puntland in ay joojiso doorashooyinka aan heshiiska lagu ahayn oo sababi kara xasilooni darro amni iyo qalalaase siyaasadeed oo Puntland ka dhalata. Shirku wuxuu ugu baaqayaa xukuumadda Puntland in ay soo fariisato miiska wadahadalada si looga wada xaajaysto xaaladda kala-guurka ee Puntland iyo sidii ay Puntland uga dhici lahayd doorasho loo dhan yahay.
2- In la joojiyo furidda iyo wax ka bedelka dastuurka dowladda Puntland maadaama hay’adaha fulinta iyo sharci dejinta xilhayntoodu gabaabsi tahay isla markaasna aanay ka turjumayn baahiyaha shacabka Puntland. Horey waxay xukuumaddu u diiday wax ka bedelka dastuurka iyadoo ka eegaysay danaheeda gaarka ah
3- In doorshada Golaha Wakiilada iyo Madaxweynahu ay ku dhacaan waqtigoodii dastuuriga ahaa ee loo asteeyey. Shirku wuxuu garwaaqsan yahay isku day kasta oo muddo kororsi ah in uu keeni karo cawaaqib xumo siyaasadeed iyo mid amni oo aan la mahadin doonin.
4- In shacabka Puntland ay ilaashadaan amniga iyo xasiloonida dhulka Puntland oo tacab iyo dhaqaale badan ka galay. Shirku wuxuu ugu yeerayaa hay’adaha amniga ee Puntland in ay gutaan waajibkooda dastuuriga ah ayna dhowraan nabadgelyada, sharafka iyo hantida shacabka Puntland.
5- In Hay’adaha amnigu ka fogaadaan ku milanka siyaasadda iyo in loo adeegsado dano gurracan, waxaan si gaar ah uga digaynaa Ciidanka Booliiska Puntland iyo Ciidanka badda Puntland (PMPF) in aan loo adeegsan in lagu khal-khal geliyo amniga Puntland.
6- In Golaha Wakiillada Puntland ee waqtigiisu gabaabsiga yahay aanay Puntland u horseedin xasilooni darro siyaasadeed iyaga oo eeganaya dano gaar ah. Sidoo kale, waxaan si gaar ah ugu baaqaynaa guddoonka Golaha Wakiilladu in aanu baarlamaanka ku dirqin dano gurracan oo madaxtooyada looga soo dhiibay.
7- In isimada iyo odayaasha dhaqanka ee Puntland ay qaataan kaalintoodii shariifka ahayd ee ay ku lahaayeen midnimada iyo xasiloonida Puntland isla markaasna ay si dhow ula socdaan khatarta ku soo fool leh Puntlad.
8- In beesha caalamku aanay dhaqaale ku bixin doorasho aan loo dhammayn ee xukuumaddu waddo taasoo horseedi karta qalalaase siyaasadeed iyo mid amni oo Puntland ka dhaca.
