Guddoomiyaha is casilay ee Baarlamaanka Soomaaliya Prof. Maxamed Sheekh Cismaan (Jawaari) ayaa la xaqiijiyay inuu maanta guddoominayo qeybta hore ee fadhiga Baarlamaanka yeelan doono.
Sida ku cad heshiis meel dhex ah oo lagu dhex dhexaadiyey guddoonka Baarlamaanka Guddoomiye Jawaari ayaa la siiyey guddoonka qeybta hore ee fadhiga Baarlamaanka, kdib markii uu dalbaday, wuxuuna shirku u dhici doonaa:
1- Furitaanka Guddoomiye Jawaari
2- Aayado Qu’raan ah
3- Ansixinta ajendaha oo ah khudbad jeedinta Guddoomiyaha is casilay ee Jawaari
4- iyo Wareejinta guddoonka oo khubadda kadib lagu wareejin dooni guddoomiye ku xigeenka koowaad
Jawari ayaa qorsheysay inuu si xushmad uga dego xilka, isagoo khudbadiisa la wada sugayo kadib dhex geli doona xildhibaannada caadiga ah ee fadhiya kulanka.
Arrintan ayaa ahayd dalab ka yimid guddoomiye Jawaari, inkasoo uu si weyn uga hor yimid guddoomiye ku xigeenka koowaad C/weli Ibraahim Muudey, haddana waxaa lagu heshiiyay in arrinta sida uu doonayo Jawaari u dhacdo.
