Madaxweynaha Soomaaliya Xasan Sheekh Maxamuud oo qaab marti gaar ah uga qayb-gelay Shir Shir-Madaxeedka dalalka Bulshada Bariga Afrika (EAC) oo ay martigelisay magaalada Arusha ee dalka Tansaaniya ayaa u gudbiyey codsi rasmi ah oo ay Soomaaliya ku dooneyso inay ka mid noqoto ururkan.
Madaxweynaha ayaa hadal ka jeediyey kulanma Madaxda EAC ayaa sheegay hawlkarnimada iyo firfircoonida ay ku tilmaaman yihiin shacabka Soomaaliyeed iyo fursadaha dhaqaale ee dalkeenna, gaar ahaan khayraadka ceegaaga sida macdanta, xoolaha iyo beeraha, kuwaasi oo Soomaaliya ka dhigaya mid ka mid ah dalalka ugu mustaqbalka fiican Gobolka iyo guud ahaan Qaaradda Afrika.
“Aad iyo aad ayaan ugu faraxsanahay in aan maanta arko calankii Soomaaliyeed oo ka dhinac babbanaya calamada dalalkiinna, waxaanna rajaynayaa in uu sidaas ahaado sanaddada soo socda. Soomaaliya waa dal aad hodan u ah. Waxa aannu leennahay khayraad macdan, xoolo iyo kuwo beero. Intaas waxa ka muhiimsan in aannu leennahay bulsho firfircoon oo ganacsiga ku fiican.”
Madaxweyne Xasan Sheekh ayaa khudbadiisa si toos ah ugu sheegay madaxda dalalka EAC, kuna yiri: “Mustaqbalka waddamadani waa uu isku xiran yahay, Soomaaliyana ma doonayso in ay culays idinku ahaato. Taas beddelkeeda, waxa aannu rabnaa in aan noqonno dal waxtar leh oo wax ku soo kordhiya dalalkan muhiimka ah. Sidaasi awgeed, aniga oo ku hadlaya magaca shacabka Soomaaliyeed, waxa aan hortiinna ku soo gudbinayaa codsi rasmi ah oo ku aaddan kamid-noqoshadeenna dalladdan.”
Haddii dalalka EAC ay aqbalaan inay Soomaaliya ka mid noqoto ururkan waxay qaadan doontaa muddo sanad ilaa laba sano ah, waxayna dadka Soomaaliyeed ka heli doonaan faa’iidooyin ay ka mid yihiin inay fiiso la’aan ku tagaan dalalkaasi, isla markaana ganacsiga Soomaalida uu gaaro magaalo kasta oo ka mida dalalka Kenya, Tanzania, Uganda, Burundi, Rwanda, South Sudan iyo DR Congo, iyadoo aan canshuur badanala saari karin.
Arrinta laga digay ayaa in shaqaale badan oo dalalkaasi ka socda ay yimaadaan Soomaaliya, sida Kenyaanka oo horeba ciriiri ugu hayey Soomaalida u shaqeysa Hay’adaha caalamiga ah, Hoteellada, waxbarashada iyo shaqooyinka kale, iyado Soomaaliya ay shaqo la’aantu mareyso heerkii ugu sareeyay dalalkaasi oo dhan.
Shuruudihii Soomaaliya lagu xiri jiray si ay uga mid noqoto Bulshada Bariga Afrika EAC sida u dhigan ururkaasi ee dowlad wanaagga, Dimoqraadiyadda, ku dhaqanka sharciga iyo arrimo kale ayaa noqon waayey ku horjoogsan kara dalabka Soomaalida, markii ay madaxda dalalkaasi aqbaleen inay ururka ku biiraan dalalka South Sudan iyo Congo Dr.
