Waxaa 26-ka April, 2022 xaafad ka tirsan degmada Waaberi, magaalada Muqdisho laga afduubtay gabar dhalinyaro ah oo la sheegay inay ka danbeyeeen koox sheegatay inay ururka Daacish ka tirsan yihiin.

Afduubkan oo ah mid ku cusub Muqdisho ayaa waxaa loo geystay gabar lagu magacaabo Xaliimo Bedel Jaamac oo ahayd 19 sano jir dhowaan ka baxday Dugsi Sare, waxayna qoyskoodu sheegeen in rag sheeganaya inay yihiin Daacish ay marar badan la soo xiriireen.

Raggan ayaa Telefoono kula hadlay qaar ka mida waalidka gabadha, iyagoo u sheegay inay doonayaan in lagu mehriyo gabadha ay afduubteen nin ka tirsan Daacish, iyagoo diiday inay dad u soo dirsadaan ehelka gabadha, welina ay hanjabaad ku hayaan qoyska.

Raggan oo gabadha aabaheed la hadalsiiyay iyadoo ooyneysa ayey ka dalbadene inuu ku mehriyo ama ay dili doonaan, waxaana qoyska ay soo wajahday xaalad adag.

Madaxda dowladda iyo Hay’adaha Amniga ayey ka dalbadeen inay arrintan wax ka qabteen oo gacan ka geystaan sidii loo badbaadin lahaa.