Safaaradda Mareykanka ayaa shaacisay in Safiirka dalkaasi u fadhiga Soomaaliya uu kulan la yeeshay madaxweynaha Hirshabeelle Maxamed Cabdi Waare oo ka qeybgalaya shirka wadatashiga arrimaha Doorashooyinka ee ka furmay Muqdisho.
Qoraal kooban oo safaaradda Mareykanka ee Muqdisho ay soo saartay ayaa lagu sheegay in Safiirka Donald Yamamoto uu ku bogaadinayo Madaxweynaha Hirshabeelle Maxamed Cabdi Waare sida uu u raadinayo dib u heshiisiin iyo wadar ogol loo dhan yahay oo laga gaaro hannaanka Doorashada Soomaaliya.
Dhinaca kale Madaxweyne Waare ayaa isna qoraal uu soo saaray ku sheegay inuu wadahadalkii ugu sharraxaadda badnaa la yeeshay Danjire Yamamoto iyo mas’uuliyiinta safaaradda Mareykanka, wuxuuna sheegay inuu aad ugu mahadcelinayo sida ay uga go’an tahay taageerada Soomaaliya xilligan adag ee la marayo.
Kulanka Safiirka Mareykanka ee Soomaaliya iyo Madaxweyne Waare ayaa ka mid ahaa kulamo xiriir ah oo safiirka la yeelanayey madaxda Soomaalida si uu ugu booriyo inay gaaraan heshiis loo dhan yahay oo ku saabsan Doorashooyinka dalka.
