Faahfaahin dheeraad ah ayaa laga bixiyey shaqaaqo shalay ka dhacay magaalada Muqdisho oo uu ku lug yeeshay Guddoomiye ku xigeenka Siyaasadda degmada Wadajir, isla markaana dhalisay qasaare dhimasho iyo dhaawac leh.
Afhayeenka ciidamada Booliska iyo Maamulka degmada Wadajir ayaa si kala gaara uga hadlay wixii dhacay iyo iska hor imaadka ciidamda Booliska iyo Milatariga Turksom, waxayna beeniyeen eedeynta ka timid Guddoomiye kuxigeenka Arrimaha Siyaasadda ee Maamulka degmada Wadajir Ciise Shiraawe Cabdi.
Ciise Sharraawe ayaa sheegay inuu ka badbaaday weerar qorsheysan lagu qaaday xilli uu ku wajahnaa Xarunta Maamulka degmada, wuixuuna ku eedeeyay maamulka degmada Wadajir inay doonayeen in la khaarijiyo.
iska hor imaadka ayaa ka dhashay, kadib markii ciidamada Booliska ee Wadajir ka howlgala ay qabteen Mooto taargo la’aan ahayd, taasoo uu lahaa askari ka tirsan Milateriga lagu tababaray Turksom, waxaana uu la soo hadlay ciidamada Booliska isgoo dalbaday inay sii daayaan Mootadiisa, balse waxaa ka diiday ciidamada.
Xiddigle Xasan Daandurey oo ciidamo wata ayaa weerar u tegay goobta lagu heystay Mootadiisa, isagoo watay afar askari, wuxuuna dagaal la galay Booliska, isagoo dilay askari, kana furtay mootadii, sida uu sheegay Afhayeenka Ciidamka Booliska Soomaaliyeed C/fataax Aadan Xasan.
Guddoomiye ku xigeenka siyaasadda degmada Wadajir ayaa ku soo dhex dhacay xaaladaasi, waxaana ilaaladiisa iyo ciidamadii uu watay Xiddigle Xasan Daandurey dhex maray is rasaaseyn lagu dilay askari, mid kalena lagu dhaawacay. Sarkaal Daandurey ayaa la sheegay in la raadinayo, kiiskana waxaa loo xiray 3 qof.
“Gudoomiye ku xigeenka Siyaasadda Wadajir waxaa uu si lama filaan ah uu kusoo galay shaqaaqo u dhaxeysay Militariga iyo Booliska, markii ay rasaastu la hubiyey ayuu durba iska difaacay asna” ayuu yiri Afhayeenka Booliska.
Qasaaraha iska hor imaadyada ayaa ah askari ka tirsan Ciidanka Booliska & iyo askari ka tirsan Millateriga oo ku geeriyooday iyo laba qof ooku dhaawacmay.
Guddoomiyaha degmada Wadajir Bashiir Maxamed Cali iyo guddoomiye ku-xigeenka Amniga Xersi Cabdulle Nuur ayaa iska fogeeyay eedeynta uga timid mid ka mida guddoomiye ku xigeennada degmada, waxayna dalbadeen oin baaritaan lagu sameeyo dhacdada.
