Dowladaha Soomaaliya iyo Mareykanka ayaa maanta kala saxiixday heshiis horumarineed oo Mareykanku Somaaliya ku siinayo lacag dhan $ 92.6 milyan oo dollar.

Heshiiskan ayaa ku saabsan taageero dhaqaale oo dowladda Mareykanka ku bixineyso barnaamijyada horumarinta Soomaaliya, sida xasilloonida, horumarinta kobaca dhaqaalaha iyo dowladnimada iyo awoodsiinta hoggaamiyayaasha mustaqbalka, haweenka iyo dhalinyarada Soomaaliyeed

Waxaa dowladda Soomaaliya heshiiskan u saxiixay Wasiirka Qorsheynta Maxamuud Cabdiraxmaan Beenebeene, iyo Wasiirka Maaliyadda Biixi Iimaan Cige, iyadoo dowladda Mareykanka uu u saxiixay Shane Dixon oo ah sii hayaha xilka safiirka Mareykanka ee Soomaaliya.

Wasiir Beenebeene ayaa sheegay in heshiiska uu Soomaaliya ka caawinayo dhisidda adkeysiga iyo xasilloonida, horumarinta kobaca dhaqalaaha iyo dowladnimada iyo awoodsiinta hoggaamiyayaasha mustaqbalka, haweenka iyo dhalinyarada Soomaaliyeed.

Shane Dixon ayaa isna yiri “Heshiiskan waxa uu xoojinayaa 17 sano oo Maraykanku uu caawimaad horumarin siinayo Soomaaliya, aragtideena wadajirka ah ee adkeysiga, iyo sida ay nooga wada go’an tahay mustaqbal barwaaqo ah.”