Madaxweynaha Hirshabeelle Cali Guudlaawe Xuseen ayaa si weyn u difaacay agaasimihii hore ee Hay’adda NISA Fahad Yaasiin Xaaji iyo Doorashada kursigaii uu kusoo baxay ee HOP086.
Qoraal kasoo baxay Madaxtooyada Hirshabeelle oo ahaa kii labaad oo lagu difaaco Fahad Yaasiin ayuu Cali Guudlaawe ku sheegay inuu ka xun yahay sida sharci-darrad ah ee loo hakiyey kursigii HOP086 oo lagu doortay magaalada Beledweyne.
Madaxweynaha Hirshabeelle ayaa ku dooday in si sharci ah loo doortay Kursiga, isla markaana aysan jirin cid dacwad ka gudbisay kursigaasi, waxa loo heystana ay yihiin arrimo siyaasadeed, isagoo ugu baaqay Guddiga FEIT inay fasaxaan kursiga HOP086.
HOOS KA AKHRISO WAR-SAXAAFADEED:
Ujeedo: Fasixid si shuruud la’aan ah Kursiga HOP086.
Jowhar: 14, Apriil, 2022:
Dowladda Hirshabeelle waxay aad uga xuntahay hakinta sharci darrada ah ee lagu sameeyay Kursiga HOP086 oo deegaan doorashadiisu tahay Dowladda Hirshabeelle.
Dowladda Hirshabeelle waxay cadeeyneysaa in doorashada kursigaas loo maray hannaan waafaqsan Heshiiskii 17-ka Sebteembar 2020 iyo habraa/cyadii doorashooyinka oo sax ah, goobjoogna ay ka ahaayeen Gudiyada SEIT, FEIT iyo Gudiga xalinta khilaafaadka, wax cabasha ahna aysan ka imaanin beesha leh kursigaas iyo murashaxiintii ku tartantay sidaas darteedna ay natiijadiisu tahay mid sax ah.
Dowladda Hirshabeelle waxay ka digeysaa tallaabooyinka ay gudiga FEIT ku xagal daacinayaan dhameestirka doorashooyinka dalka.Dowladda Hirshabelle waxay cadeynaysaa in kursiga tirsigiisu yahay HOP086 aysan jirin wax habraac qaldan ah balse loo heysto dano siyaasadeed taasina waxaa cadeyn u ah in gudiga FEIT uu caawa fasaxay kuraastii lala hakiyay iyadoo aysan jirin wax habraac qaldan ah oo lasaxay, arintuna ay tahay anigaa qabsaday anigaana fasaxay tasoo muujineeyso kutakrifal awoodeed.
Uga dambeeyn Dowladda Hirshabeelle waxay ugu baaqaysaa Gudiga FEIT iney fasaxaan kursiga tirsigiisu yahay HOP086 dhowraana heshiisyadii Madasha Watashiga Qaran si looga fogaado waxkasta oo dib udhac u keeni karo doorashada Dalka.
-DHAMAAD-
