Madaxtooyda Soomaaliya ayaa shaacisay heshiis ku saabsan xoojinta xiriirka labad adal ee ay gaareen madaxda dalalka Soomaaliya iyo Kenya, kadib socdaal uu Xasan Sheekh ku tegay dalkaasi.
Qoraalka Madaxtooyada Soomaaliya ayaa ahaa mid kooban oo isku dhex jira, halka Madaxtooyda Dowladda Kenya ay faafisay War-murtiyeed qodobeysan oo faahfaahsan kana kooban 11 Qodob.
“Labada Madaxweyne ayaa isla qaatay qodobbo xoojinaya iskaashiga amni, dhaqaale iyo siyaasadeed ee labada dal, iyagoo isla gartay heshiis meesha ka saaraya caqabadaha dhanka socdaalka ee ka dhashay madmadowgii ku jiray xiirirka labada dal, waxaana muwaadiniinta Soomaaliyeed ay fursad gaar ah u heleyaan fududeynta dal ku-galka Kenya, iyadoo la soo celiyey duulimaadyada shirkadda Kenya Airways oo si joogta ah u imaandoonta dalka” aya lagu yiri Warka Villa Somaliya
Sidoo kale Madaxtooyada Soomaaliya ayaa sheegtay in Madaxweyne Xasan Sheekh Maxamuud iyo Madaxweyne Uhuru ayaa isla qaateen xoojinta iskaashiga ganacsi ee labada dal, iyadoo ganacsatada Soomaaliyeed ay fursad u heleyaan in ay dalkaas u dhoofiyaan waxsoosaarka kalluunka dalkeenna, lana furayo soohdinta Soomaaliya iyo Kenya, taas oo qeyb ka ah fududeynta dhaqdhaqaaqa badeecadaha iyo adeegyada ee labada dal.
“Labada Madaxweyne ayaa wada jir u go’aamiyey In Guddiga Wadajirka ah ee Iskaashiga (JCC) Soomaaliya iyo Kenya ay ku kulmi doonaan Muqdisho bisha Ogoosto ee sanadkan, si loo qaabeeyo iskaashiga hawlaha amniga, horumarinta beeraha, ganacsiga, caafimaadka, waxbarashada, tababarada iyo xal u helista dhibaatooyinka isbeddelka cimilada” aya lagu soo koobay war-saxaafadeedka Madaxtooyada Somaliya.
