Guddoomiyaha Aqalka Hoose ee baarlamanka Soomaaliya Maxamed Cismaan Jawaari ayaa maanta iscasilay kadib saddex toddobaad oo loolan siyaasadeed uu kala dhaxeeyey ra’iisul wasaare Xasan Kheyre.

Xildhibaan Xuseen Carab Ciise ayaa xaqiijiyey in guddoomiye Jawaari uu iscasilay. “Guddoomiye ku xigeenka baarlamanka Cabdi Weli Muudeey ayaa maanta horteena ku aqriyey warqadda iscasilaadda ee ka timid guddoomiye Jawaari” ayuu yiri Xuseen Carab.

Xuseen Carab ayaa sheegay in Jawaari uu qaatay talada madaxweye Farmaajo oo ahayd inuusan sii dheereyn is-marin waaga siyaasadeed.

Wuxuu intaasi ku daray in is-casilaadda Guddoomiye Jawaari loo yeelay marqaatiyaal, isla markaana ay timid waqti loo baahnaa, laakiin xildhibaannada raacsan Guddoomiyaha ayaan weli ka hadlin arrintan.

Guddoomiye Jawari oo dhinaciisa aan laga heynin war war ah ayaa wararkii ugu danbeeyay sheegayaan inuu xilli danbe aroortii seexday oo goor dhoweyd ay is arkeen xildhibaannadii ugu horeeyay, waxaana la sheegay inuu xanuunsanayo, isagoo uu xaaladda kala hadlay, isagoo u sheegay in Arbacadda ay wax waliba kala caddaan doonaan.

Baarlamanka Soomaaliya ayaa haysta laba toddobaad inuu ku doorto afhayeen cusub, iyadoo musharixiinta xilkan u taagan ay aa u fara badan yihiin.