Waxaa soo baxaya faahfaahinta qasaaraha kadhashay dagaalkii ay saaka aroortii Alshabaab ku qaadeen degaanka Wisil ee Gobolka Mudug oo ay saldhig ciidan ku lahaayeen ciidamada Galmudug.

In ka badan 20 qof ayaa ku geeriyootay weerarka oo maleeshiyada Al-shabaab ay ku bilaabeen Gaari Qarax sida oo lala beegsaday xerada ciidamada Daraawiishta Galmudug ay ku leeyihiin degaanka Wisil ee gobolka Mudug.

Wararka laga helay dadka degaalka ayaa sheegaa n qaraxa gaariga kadib ay Alshabaab dhowr jiho ka weerarraan magaalada, balse ciidamada Galmudug ay iska caabiyeen, iyadoo qasaare badan gaarsiiyey Alshabaab, wuxuuna dagaalku socday muddo laba saacadood ku dhow.

Sarkaakiisha Galmudug ayaa sheegay inay dagaalka ku dileen 20 dagaalame oo ka tirsan Alshabaab, waxaa kaloo jira qasaare soo gaaray dadka rayidka, kadib madaafiic ay Alshabaab ku garaacday magaalada.

“Abaaro 4:30 habeenimo xilliga oo la isku diyaarinayay salaad subax ayay weerar gaadmo nagu soo qaadeen kaasi oo ay ku bilaabeen qarax balse qasaaraha iyagu uu soo gaaray” ayuu yiri Taliye ku xigeenka Booliska Gobolka MudugGashaanle Maxamed Mire Maxamuud oo Warbaahinta u sheegay in la jebiyay, haddana lagu raad joogo.

Dadka degaanka ayaa sheegaya in askar badan ay Alshabaab ku dileen qarixii hore iyo weerarka habeennimo, balse kadib ay is abaabuleen ciidamada Galmudug iyo dadka degaanka oo dagaal culus la galay dibna u celiyey maleshiyadii Alshabaab

Qasaaraha dhimashadu ayaa intaas ka badnaan, waxaana dhimashada la gaarsiinayaa ilaa 50 dagaalamayaal iyo shacab isugu jira. Halka Alshabaab ay dhinaceeda sheegatay inay weerarka ku dishay askar ka badan 34.

Dhinaca kale, ugu yaraan lix qof oo rayid ah ayaa geeriyooday, kaddib markii gaari ay la socdeen ay miino kula kacday inta u dhexeysa magaalooyinkaa Wisil iyo Gawaan.