Haweenka lagu helay inay la shaqeeyaan Alshabaab waxaa ugu danbeysay Faadumo Xuseen Cali Caddaawe oo maxkamadda Ciidamada Qalabka sida ee dowladda Soomaaliya ay ku xukuntay 15 sano oo xabsi ciidan ah.

Haweeneydan waxay ahayd shaqaale ka tirsan maamulka Gobolka Banaadir iyo Hooyooyinka Qaranka, waxaana Alshabaab ay ku guuleysteen inay ku qanciyaan inay u noqoto basaasad la shaqeysa oo uga soo waranto xarumaha maamulka iyo degmooyinka Gobolka Banaadir dhaqdhaqaaqa ka socda, iyagoo hoos tegi jirtay madaxii howlgallada Alshabaab ee G/Banaadir Axmed Maxamed Xaaji (Ilka-case) oo isna Dil toogasho ah shalay lagu xukumay.

Sida u caadada ah Alshabaab Faadumo Xuseen Cali waxay lahayd magacyo afgarasho ah oo ay ka mid yihiin: Faadumo Korneyl iyo Cosobo, waxaana warbixinta hay’adaha ammaanka ka qoreen ay muujineysaa inay tahay 24 sano jir, kasoo jeeda Gobolka Hiiraan, iyadoo uu ururka Alshabaab ku biiriyey Nin ay Eedadeed dhashay C/llaahi Cabdi Biya-maaxo, iyadoo uu Amiir u ahaa eedeysane kale oo shalay la xukumay Saalim Siciid Salmaan.

Howsha loo xilsaaray Faadumo Cosobo waxay ahayd inay is tusiso dableyda Khaarijiyeyaasha ah ee Alshabaab ka tirsan iyo dadka ay dilayaan, waxayna qeyb ka ahayd shirqoolo lagu fuliyey saraakiil ka tirsan ciidamada Booliska iyo Mas’uuliyiin kale.

Wareysi lala yeeshay Faadumo ayey ugu sheegtay baareyaasha kaliya iyada loo diray inay soo ogaato mas’uuliyiinta goobaha ay ka shaqeyso iyo meelaha ay joogaan, kuna wargeliso qeybta ay la shaqeyso, iyadoo adeegsaneysa shaqada ay ka heyso maamulka Gobolka Banaadir.

Haween aan yareyn ayaa Alshabaab kala shaqeeya howlgallada iyo qaraxyada ay ka fuliyaan Muqdisho, waxayna Faadumo ka mid tahay kuwa ay suuragashay inay gacanta ku soo dhigaan ciidamada Amniga ee ugu danbeyn cadaaladda la hor geeyay.