Saraakiil sare iyo askar gaareysa 18 qof ayaa dhintay, ka dib markii diyaarad helikobtar uu milaterigu Itoobiya leeyahay ay ku burburtay duleedka caasimadda Itoobiya e Addis Ababa.
Dhammaan dadkii saarnaa diyaaradda ayaa la sheegay inay dhinteen oo aanay jirin cid ka badbaaday shilkaas. Saraakiisha Itoobiya ayaa sheegay in dayaaradda milateri ay ka soo duushay magaalada Diri-dhabe ee bariga Itoobiya oo ay kusii jeedday magaalada Addis Ababa markii ay ku dhacday Bariga Shoa ee gobolka Oromia.
Warar deegaanka laga helayo waxay sheegayaan in 15 askari iyo seddex qof oo rayid ah ay saarnaayeen. Sababta shilka dhalisay weli lama ogaan, laakin saraakiil sare ayaa sheegaya in baareyaasha iyo kooxaha baadigoobka iyo samata bixinta loo diray halkaas.
