Alshabaab ayaa baahisay muuqaallada maleeshiyo fara badan oo tababar loo soo xiray, kuwaasoo ay ku jiraan is-miidaamiyeyaal boqolaal ah.
Bandhigan oo aan la sheegin halka uu ka dhacay, balse loo maleynayo Jubbooyinka ayaa waxaa kasoo muuqday Afhayeenka Alshabaab Cali Maxamuud Raage oo ciidamadaasi u sheegay inay qaadi doonaan weerarro caddowga lagu laayo sida weerarradii Buulomareer iyo Mesagowaay, sida uu yiri.
Sheekh Cali dheere oo khudbad dheer ka jeediyay bandhigga ayaa sheegay in Gaadiidkii ugu badnaa ay Alshabaab heleen marxaladan dagaaladii ugu danbeeyay, wuxuuna tiriyay magacyada saraakiishii ciidamada dowladda looga dilay dagaalka.
Dhoolatuska Alshabaab ayaa ahaa kii ugu ballaarnaa ee ay soo bandhigto, waxaana ka muuqday boqolaal ciidan oo hubeysan, kuna lebisan dareyska ciidamada oo si gaara loo habeeyay, iyadoo ay Alshabaab ku muujisay awoodeeda milateri, kadib wejigii koowaad ee dagaalka ay la gashay ciidamada dowladda Federaalka Soomaaliya oo looga qabsaday degaano ka tirsan Sh/Dhexe, Hiiraan iyo Galgaduud.
