Kadib Geeridii Guddoomiyihii hore ee G/Banaadir Marxuum C/raxmaan Cumar Yariisow waxaa si xowli ah ku socda tartanka loogu jiro xilka Guddoomiyaha G/Banaadir oo caadiyan laga soo xulo beel gaar ah.
Wararka qaar ayaa sheegaya in intii uu dhaawaca ahaa Guddoomiye Yariisow ay musharixiinta doonaya xilkan bilaabeen ololahooda, iyadoo si weyn loogu cambaareeyay damiir xumo xubno aan la magacaabin oo la sheegay inay xilligaasi bilaabeen ololahooda xilka ugu sareeya Maamulka Gobolka Banaadir.
Madaxweynaha Soomaaliya Maxamed C/llaahi Farmaajo iyo Ra’iisal wasaaraha Xasan Cali Kheyre ayaa bilaabay la-tashiyada ku saabsan ciddii xilkan loo magacaabi lahaa, iyadoo wararku sheegayaan inay u badan tahay in loo magacaabo shaqsi ay isku beel yihiin Marxuum Yariisow.
Xubnaha la hadal hayo inay taageero ka heystaan madaxda sare ee la filayo in laga soo xulo guddoomiyaha cusub ee G/Banaadir ayaa kala ah:
1- Cumar Cabdullaahi Xasan (Cumar Qaanso)
Guddoomiyihii hore ee degmada Wadajir oo dhowaan xilkaasi laga qaaday, wuxuu taageero ka heystaa madaxweyne Farmaajo, waxaana la sheegay inuu buuxin karo shuruudaha ay doonayaan madaxda sare inuu yeesho qofka ay xilkan u dhiibayaan.
2- Cumar Maxamed Cabdulle (Cumar Dhagey)
Guddoomiyihii hore ee Guddiga Doorashada Baarlamaanka hadda jira, haddana ah la-taliyaha Ra’iisal wasaaraha, wuxuu hore uga mid ahaa musharixiinta xilkan markii la eryay guddoomiyihii hore Thabit Cabdi, haddana waxaa la sheegay inuu ku jiro liiska musharixiinta, laakiin waxaa caqabad ku noqonaya inay madaxda sare ugu baahan yahay Doorashada soo socota, isla markaana uu yahay sharci-yaqaan ay fududahay inuu ka hor yimaado danaha madaxda sare.
3- Yuusuf Cabdi Cabdulle (Yuusuf Jaalle)
Maareyihii hore ee Hay’adda Duulista iyo Saadaasha hawada waa musharax kale oo xilkan loo saadaalinayo, waxaana xilkii hore looga qaaday isku dhac dhex maray isaga, shaqalaha iyo madaxda Wasaaradda uu ka tirsanaa July 2018, taasoo keentay in madaxweyne Farmaajo oo uu saaxiib lahaa xil kale u magacaabi waayo, rajadiisa xilkan ayaana la sheegay inaysan badneyn.
4- Axmed Maxamed Maxamuud (Axmed Washington)
Maareeyaha Dekadda Muqdisho Axmed Washington wuxuu hore uga mid ahaa musharixiinta uu xilka u soo sharxay madaxweyne Farmaajo, kadibna waxaa loo magacaabay agaasimaha Dekadda. Rajada xilligan ee in loo magacaabo guddoomiyaha G/banaadir ayaa ah mid yar, tasoo ay ugu wacan tahay xilka uu hayo.
MUSHARIXIIN KALE OO IS WADA
Dhinaca kale waxaa jira xubno iskood ugu ordaya inay ku soo baxaan xilkan oo taageero ka raadsanaya odayaasha iyo kaaliyeyaasha madaxda sare ee dowladda, waxaana ka mida xildhibaan C/qaadir Carabow Ibraahim iyo Cali Gacal Gaabow oo ah agaasimaha Guud ee Wasaaradda Gaadiidka iyo Duulista Hawada oo ay olole u wadaan xubno ka mida xukuumadda.
