Waxaa maanta dib u dhac ku yimid Aaskii Qaran ee la qorsheeyay in loo sameeyo Guddoomiyihii hore ee G/banaadir, ahaana duqa magaalada Muqdisho oo magaalada Doha ee dalka Qatar ugu dhintay dhaawac 24-kii July 2019 kasoo gaaray qarax ka dhacay xafiiskiisa,
Wararka laga helayo magaalada Doha ayaa sheegay in diyaarad milateri oo soo qaadi lahayn Meydka Marxuum Yariisow ay ciladi qabsatay markii loo diyaariyey inay safarka isu diyaariso, taasoo keentay in dib u dhac ku yimaado Aaskii maanta la qorsheeyay oo loo xiray wadooyinka muhiimka ah ee caasimadda.
Lama oga xilliga kale ee meydka la keenayo magaalada Muqdisho, waxaana socda dadaal lagu doonayo in Berri lagu soo qaado meydka Marxuum Yariisow, iyadoo weli Guddiga qabanqaabada Aaska Qaran aanu ka hadlin arrintan.
